Dáse así continuidade ás mobilizacións que a CIG vén realizando dende hai meses para demandarlle á empresa que regrese ao convenio do comercio de alimentación, do que saíu no ano 2006 para pasar a aplicar un convenio propio de condicións inferiores negociado en Madrid.

As delegadas da CIG, Maricarme Campos e Alejandra Formoso, explicaron en rolda de prensa que os salarios en Eroski (que en Galiza opera como unha sociedade co grupo Vegalsa) son os máis baixos de todo o sector e ademais é a empresa que ten as peores condicións laborais.

Para cumprir coa lexislación laboral en vigor, a empresa colleu as táboas salariais do convenio estatal de grandes almacéns, cuxos salarios seguen sendo substancialmente inferiores aos que estabelecen os convenio do comercio de alimentación da Coruña e Pontevedra. 

Pero a solución adoptada por Eroski-Familia supón condenar as traballadoras e traballadores a seguir sendo os peor pagados do sector, mais tamén á precariedade laboral, pois dende o ano 2006, o persoal perdeu dereitos a nivel de xornada e licencias con respecto ás compañeiras e compañeiras de Gadis ou Froiz.

Por iso, a CIG-Servizos fai un chamamento ao persoal do sector a participar nesta mobilización e reclamarlle a Vegalsa-Eroski que regrese ao convenio provincial "do que nunca debeu saír".