A parte social cualifica de “tomadura de pelo” as propostas das patronais, que pretenden eliminar o dereito á xubilación parcial; o artigo do convenio que regula o dereito a ampliar xornada cando haxa vacantes ou postos libres no centro de traballo ou na empresa; un incremento salarial do 0% para o ano 2020 e un miserento 0,8% para 2021. 

O representante da CIG na mesa de negociación, Paulo Rubido, denuncia que as empresas pretenden aproveitarse da emerxencia sanitaria para recortar dereitos e conxelar salarios, cando este é un dos sectores que se está a beneficiar da pandemia, porque no último ano incrementou a súa facturación polo reforzo das horas extra de limpeza e as desinfeccións.

Por iso avanza que “pelexaremos para conseguir melloras salariais e non imos permitir que se modifique nin a xubilación parcial, nin a cobertura de vacantes. Ante a actitude destas patronais non nos queda máis que ir á folga para garantir unhas condicións dignas para as máis de 10.000 traballadoras e traballadores da provincia atinxidos por este convenio”.