A representación da CIG (2 delegados/as) e de CCOO (1 delegado/a) no comité de empresa (a UGT conta con 2 representantes, pero non se opón á externalización) compareceu hoxe en rolda de prensa para denunciar que a compañía externalizará a limpeza de habitacións, balneario, cociña e zonas comúns a partir do vindeiro 1 de maio a pesar da súa oposición, que lle foi trasladada á compañía mediante un informe presentado en tempo e forma. “Mais a dirección comunicou que non lle ían facer ningún caso, xa que a decisión estaba tomada e só informaran por imperativo legal”. 

A medida afectará a 9 das 37 persoas que integran o actual cadro de persoal (30 fixas descontinuas e 7 fixas), despois de que nos últimos anos o número de traballadores/as se fora reducindo drasticamente: en 2007 había 280, en 2011 168, en 2015 152 e en 2019 66.

Entenden que se trata dunha represalia por non ter aceptado o expediente de regulación de emprego de redución de xornada presentado pola empresa para o conxunto do persoal o pasado mes de marzo aducindo obras no establecemento e a situación de grave crise económica. “Nese momento non partexou ningunha outra medida, pero dias despois comunica a decisión de externalizar o servizo de limpeza, o que consideramos actuar de mala fe e ocultar información”, censuran.

Ademais, consideran que o obxectivo desta decisión empresarial é recortar a pluralidade na representatividade dos representantes legais dos traballadores/as, xa que tras a externalización o cadro de persoal vai ser inferior a 30 persoas, quedando como persoal da empresa a propia estrutura básica, polo que xa non se escollería comité de empresa, senón un/ha único/a representante como delegado/a de persoal.

Ao mesmo tempo, lembran que en outubro de 2016 a empresa propúxolle a modificación contractual a todo o persoal fixo para convertelo en fixo descontinuo, “como medida menos gravosa que a extinción da relación laboral, tendo unha aceptación voluntaria por case todo o persoal”. Fixábase tamén unha garantía mínima de emprego de sete meses ao ano, coa posibilidade de incrementala a nove meses, medida que segue vixente na actualidade.

Plan estratéxico

Segundo explican, a dirección enmarca a externalización <<en el contexto del plan estratégico de mejora de los servicios del hotel, diseñado para racionalizar y optimizar su gestión, ajustándola a la realidad actual del mundo hotelero>>. “Mais a representación legal dos traballadores/as non recibiu información ningunha, e polo tanto non ten coñecemento do plan, nin desde cando existe; a empresa non facilitou ese plan no seu día, nin se nos facilita agora para proceder ao seu exame”, critican. 

A decisión é unha represalia por non ter aceptado o ERE de redución de xornada

Inciden en que unha externalización “faise para obter servizos ou habilidades que xeralmente resultan difíciles de desenvolver pola empresa principal ou carecer esta de man de obra cualificada ou non”. E sosteñen que este non é o caso, xa que as persoas se ceden da empresa principal Eurostars Gran Hotel La Toja á subcontrata Linton Grey SL, que traballa para o grupo Hotusa.

Neste senso, aseguran que o Gran Hotel La Toja conta cos medios e cos recursos suficientes para levar a cabo estas tarefas, como fai na actualidade, e o único que fará é ceder estas persoas para facer o mesmo traballo e nas mesmas condicións, no mesmo centro de traballo, baixo as mesmas ordes, cos mesmos horarios, os mesmos días, etc. “Isto é un mero subministro de traballadores/as”, afirman.

Finalmente, inciden en que a situación da empresa derivada da caída da demanda de servizos, ademais das circunstancias externas “imprevisíbeis e inevitábeis” dos últimos tempos, tamén se debe a unha “política errada” en canto á oferta e calidade do servizo que ofrece en comparación coa que se ofrecía con anterioridade, “e con esta medida de externalización non se vai mellorar nada”.

Polo que entenden que recuperar e manter a ocupación e a demanda “vai depender de se á clientela se lle ofrece a posibilidade de vir noutras épocas fóra do verán e das fins de semana e de se os servizos que busca nun establecemento coma este estean dispoñíbeis, xa que agora é un establecemento de tempada”.